ᐊᓈᓇᐅᔪᖅ, ᐃᕐᓂᖓᓗ ᒪᒥᓴᖅᐸᓪᓕᐊᕗᑦ ᐊᑕᐅᑦᑎᒃᑯᑦ ᐅᕘᓇ ᑎᒃᑖᒃᑎᒍᑦ (TikTok)

For English version, see ‘Now we’re on a trip together’: Mother, son share healing journey on TikTok

ᐳᕇᑕᓐ ᑕᑦᓗᓐ ᔮᓐᔅᑕᓐ ᐊᒻᒪ ᐊᓈᓇᖓ ᕼᐅᕙᒃ ᔮᓐᔅᑕᓐ 200,000 ᐅᖓᑖᓃᑦᑐᓂᒃ ᑎᒃᑖᒃᑯᑦ ᑕᕐᕆᔭᖅᑕᐅᕙᒃᑑᒃ ᑲᑎᖢᑎᒃ.

ᑖᒃᑯᐊᒃ ᑕᕐᕆᔭᒐᓕᐊᖏᑦ — ᓴᖅᑭᔮᖅᑎᑦᑎᕙᒃᖢᑎᒃ ᖃᐅᑕᒫᓐ ᐊᑐᖅᐸᓪᓕᐊᕙᒃᑕᖏᓐᓂᒃ ᓲᕐᓗ ᒪᑯᑎᑐᓇᖅ ᐃᓄᒃᓯᐅᑎᓂᒃ ᓂᕆᓕᕌᖓᑕ ᐅᕝᕙᓘᓐᓃᑦ ᕿᓯᖕᓂ ᐊᓐᓄᕌᓂ ᑕᑯᖅᑯᔾᔨᕙᒃᖢᑎᒃ — ᑕᑯᔭᐅᐱᐊᕐᓯᒪᓕᖅᐴᒃ ᒥᓕᐊᓐᑲᓪᓛᓗᖕᓂ.

ᐃᓚᒌᑦᑎᐊᖏᓐᓇᓚᐅᕐᓯᒪᙱᑦᑑᒐᓗᐊᒡᓕ ᓯᕗᓂᐊᒍᑦ.

ᓯᕗᓂᑲᓪᓛᓂᒃ ᑏᒃᑖᒃ ᐱᒋᐊᓚᐅᖅᑎᓐᓇᒍ ᑖᒃᑯᐊᒃ ᐊᐴᑎᖃᑎᒌᒃᐸᓚᐅᕐᓯᒪᔫᒃ ᓈᒪᒌᖃᑦᑕᐅᑎᓗᐊᙱᖢᑎᒃ.

ᕼᐅᕙᒃ ᐅᖃᓚᐅᕐᑐᖅ ᐊᒃᓱᕈᕈᑎᖃᕐᓯᒪᓪᓗᓂ ᓈᒻᒪᙱᓕᐅᕈᑎᕕᓂᖓᓂ ᐃᓕᓐᓂᐊᕆᐊᖅᑎᑕᐅᕙᒃᑎᓪᓗᒍ ᑎᑭᑉᐸᓵᖅᖢᓂ ᓈᒻᒪᙱᓕᐅᕈᑎᒋᓯᒪᔭᖓ ᐃᓐᓇᕈᕐᓂᓕᒫᖓᓄᑦ.

ᐳᕇᑕᓐᓕ, ᑕᐃᒪᐃᑎᓪᓗᒋᑦ ᐅᖃᓚᐅᕐᑐᖅ 24-ᓂ ᐅᑭᐅᖃᖅᖢᓂ ᐊᑐᓗᐊᖃᑦᑕᖅᓯᒪᓂᑰᓪᓗᓂ ᖁᕕᐊᓲᑎᖃᕐᓂᕋᓚᐅᕐᑐᖅ ᐊᕐᕌᒍᓂ ᑎᓴᒪᓂᒃ ᐊᖓᔮᙲᓐᓇᓕᕐᓂᖓᓂᒃ.

“ᐃᒻᒪᖄᓪᓘᓐᓃᑦ ᐊᑕᐅᓯᕐᒥ ᐃᒡᓗᕈᓯᕐᒦᖃᑎᒌᑐᐃᓐᓇᓕᕈᓐᓄᒃ 5 ᒥᓂᒥ ᐅᕙᑦᑎᓐᓄ ᑐᕐᖢᓛᑲᑕᓕᔭᓚᐅᕋᓐᓄᒃ ᐅᕝᕙᓘᓐᓃᑦ ᓇᓕᖅᐳᒃ ᕿᐊᑲᑕᓕᖅᖢᓂ ᑕᐃᒪᓐᓇᕈᓘᔭᖅ,” ᕼᐅᕙᒃ ᐅᖃᓚᐅᕐᑐᖅ ᐊᐱᖅᓱᖅᑕᐅᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ, ᐃᕐᓂᖓᑕ ᓴᓂᑦᑎᐊᖓᓂ ᐃᒃᓯᕚᖅᖢᓂ ᑐᓴᒐᒃᓴᓕᐅᖅᑎᒃᑯᑦ ᐃᖃᓗᖕᓂ ᑎᑎᕋᕐᕕᖓᓃᖢᑎᒃ ᑕᖅᑭᖅ ᐱᒋᐊᓕᓵᖅᓯᒪᑎᓪᓗᒍ.

“ᒫᓐᓇᓕ ᓇᒧᙵᐅᑲᑕᓕᖅᑐᒍ ᐱᖃᑎᒌᒃᖢᓄᑦ, ᓯᕗᓂᐊᓂᓪᓕ ᐅᒃᐱᕈᓱᒃᑐᖃᕋᔭᓚᐅᙱᑦᑐᖅ ᓇᒧᙵᐅᖃᑕᒡᓗᑕ ᐱᖃᑎᒌᕋᔭᕐᓂᑦᑎᓐᓂ ᑕᐃᔅᓱᒪᓂ.”.

ᕼᐅᕙᒃ ᐃᓅᓚᐅᕐᓯᒪᔪᖅ ᒫᓐᓇ ᐃᓄᖃᕈᓐᓃᕐᓯᒪᔪᒥ ᓄᓇᕗᒥᑦ ᓄᓇᓕᕕᓂᕐᒥᒃ ᐅᒥᖕᒪᖅᑑᕐᒥ ᐊᒻᒪ ᒫᓐᓇ ᓄᓇᑦᓯᐊᕐᒥ ᓄᓇᖃᖅᖢᓂ. ᐳᕇᑕᓐ ᖁᒡᓗᖅᑑᖅᒥᐅᑕᖅ ᒫᓐᓇᓕ ᑳᒍᕆᒦᑦᑐᖅ ᓯᓚᑦᑐᖅᓴᕐᕕᐊᓗᒃᒥ ᐃᓕᓐᓂᐊᕆᐊᖅᖢᓂ, ᑕᕝᕙᓂ ᐃᓕᓐᓂᐊᖅᖢᓂ ᖃᐅᔨᕙᓪᓕᐊᒍᑎᓄᑦ ᓇᓗᓇᐃᒃᑯᑎᑖᕋᓱᒃᖢᓂ.

ᑕᒪᕐᒥ ᐅᖃᓚᐅᕐᑑᒃ ᓇᐅᒃᑰᕐᓂᐊᕐᓂᖏᓐᓂᒃ ᖃᐅᔨᕚᓪᓕᕐᓂᕋᖅᖢᑎᒃ ᒪᒥᓴᖃᑦᑕᕐᓂᒃᑯᑦ ᐊᒻᒪ ᐃᓅᓯᓕᕆᔭᐅᓂᒃᑯᑦ.

ᑕᒪᓐᓇ ᕿᓄᐃᓵᕈᓘᔭᕐᓇᓚᐅᕐᓯᒪᔪᖅ ᐊᒻᒪ ᑐᑭᓯᖃᑦᑕᐅᑎᔪᓐᓇᕐᔫᒥᓂᕐᒥ ᐃᖕᒥᖕᓂᒃ, ᑭᓯᐊᓂᓕ ᐊᓈᓇᐅᔪᖅ ᐃᕐᓂᖓᓗ ᐅᖃᓚᐅᕐᑑᒃ ᐅᓂᒃᑳᖏᓐᓂ ᐊᑐᕐᓗᑎᒃ ᐊᓯᖏᓐᓂᒃ ᐃᓄᖕᓂ ᒪᒥᓴᖅᐸᓪᓕᐊᔪᓐᓇᖅᓯᖁᔨᓪᓗᑎᒃ.

“ᐊᑐᕋᑦᑕ ᖃᓄᐃᓕᐅᑲᑕᒃᐸᓪᓕᐊᓂᑦᑎᓐᓂᒃ ᓄᖅᑲᖅᑎᑦᑎᓇᓱᒃᖢᑕ ᓈᒻᒪᙱᓕᐅᕈᑎᐅᕙᒃᑐᓂᒃ ᐊᒻᒪᓗ ᖃᓄᖅ ᐊᒃᑐᐊᓂᕐᓴᐅᓕᕋᓱᖕᓂᑦᑎᓐᓂᒃ ᐊᓈᓇᓐᓄᑦ ᐃᕐᓂᐅᓪᓗᖓ ᑭᓯᐊᓂᓕ ᐱᖃᓐᓇᕇᒡᓗᓄᑦ.” ᐳᕇᑕᓐ ᐅᖃᕐᑐᖅ.

“ᐱᒻᒪᕆᒃᑎᒎᖃᑦᑕᕋᑦᑕ ᑐᓴᒐᒃᓴᓕᕆᓂᒃᑰᖅᖢᑕ, ᑕᐃᒪᓕ ᐱᒻᒪᕆᐊᓘᖂᔨᙱᑦᑐᖅ ᐃᓛᓐᓂᒃᑯᑦ.”

ᕼᐅᕙᒃ ᐅᖃᒃᑲᓐᓂᖅᖢᓂ, “ᐃᓕᓐᓂᐊᕆᐊᕐᕕᒋᓚᐅᖅᑕᑦᑎᓐᓂ ᑕᒪᒃᑯᐊ ᐃᓄᐃᑦ ᓯᕗᓂᓐᓃᓚᐅᕐᑐᑦ ᐅᖃᐅᔾᔭᐅᕙᓚᐅᕐᒪᑕ ᐃᓚᖏᓐᓂ ᖃᑕᙳᑎᖏᓐᓂᓪᓘᓐᓃᑦ ᐅᖃᓪᓚᖃᑎᖃᖃᑦᑕᖁᔭᐅᙱᖢᑎᒃ ᐊᒻᒪᓗ ᓴᖅᑭᔮᖅᑎᑦᑎᖁᔭᐅᙱᖢᑎᒃ ᓇᒡᓕᒍᓱᖕᓂᕐᒥᒃ.

“ᐱᒻᒪᕆᐊᓘᒋᒐᒃᑯ ᐅᕙᑦᑎᓐᓂ ᐊᒃᑐᐊᓂᕐᓴᐅᓕᕐᓗᑕ ᑕᐃᒪᓐᓇ, ᐊᒻᒪᓗ ᐊᔪᕐᓇᖅᑐᐊᓘᒐᓗᐊᖅᐸᑦ ᐊᒻᒪ ᐊᒃᓱᕈᓐᓈᓗᒡᖢ ᑕᐃᒪᓕ ᐅᕙᑦᑎᓐᓄᑦ ᕿᓄᐃᓵᖃᑦᑕᕆᐊᖃᖅᐳᒍᒃ.”

ᐳᕇᑕᓐ ᐊᒻᒪ ᕼᐅᕙᐅᑉ ᑎᒃᑖᒃᑯᑦ ᖃᓄᐃᓕᐅᕈᑎᒋᕙᓪᓕᐊᓂᖏᑦ ᐃᓅᓯᕆᓕᕆᕙᖓᑦ ᒫᓐᓇᐅᔪᖅ.

ᐃᑭᐊᕿᕕᒃᑯᑦ ᓴᖅᑭᔮᖃᑦᑕᕐᓂᖏᑦ ᑭᒃᑯᓕᒫᓄᑦ ᐃᓕᓴᕆᔭᐅᔾᔪᑎᒋᓪᓗᓂᔾᔪᑦ ᑖᒃᑯᐊᒃ ᐱᒻᒪᕆᒋᔭᐅᓯᒪᓕᖅᑑᒃ ᐅᑭᐅᕐᑕᖅᑐᕐᒥ ᐊᒻᒪ ᐃᓄᐃᑦ ᓄᓇᓕᖏᓐᓂᒃ ᐊᒻᒪᓗ ᐅᐸᒃᑕᐅᓚᐅᖅᐸᒃᖢᑎᒃ ᑭᒃᑯᓕᒫᓂᒃ ᖁᕕᐊᒋᔭᓕᖕᓂᒃ ᐅᖃᐅᓯᕆᕙᒃᑕᖏᓐᓂᒃ.

ᐃᓄᓕᒫᓄᑦ ᐃᓕᓴᕆᔭᐅᔾᔪᑎᖃᕋᓱᒃᓯᒪᙱᑦᑑᒃ ᑭᓯᐊᓂᓕ ᖁᕕᐊᓱᒻᒪᕆᒃᑑᑦ ᑕᕐᕆᔭᒐᓕᐊᖏᑦ ᐃᑲᔫᑎᑎᖃᖃᑦᑕᕐᓯᒪᖕᒪᑕ.

ᑕᕐᕆᔭᒐᓕᐊᖏᓐᓂᒃ, ᐳᕇᑕᓐ ᐅᖃᓪᓚᖕᓂᕐᓴᐅᕙᒃᑐᖅ ᐊᔾᔨᓕᐅᕈᑎᒧᑦ, ᐅᖃᐅᓯᖃᖅᐸᒃᖢᓂ ᐃᓄᐃᑦ ᐃᓕᖅᑯᓯᖏᓐᓂᒃ ᐅᕝᕙᓘᓐᓃᑦ ᐃᓱᒪᒨᖓᔪᓂᒃ ᐃᓱᒫᓘᑎᐅᕙᒃᑐᓂᒃ ᐊᒻᒪ ᐋᖓᔮᖃᑦᑕᙱᓐᓂᕐᒥᒃ. ᕼᐅᕙᒃ ᑕᐅᑐᒃᑐᓂᒃ ᐅᐸᒍᑎᕙᓪᓕᐊᔭᖏᓐᓂᒃ ᖃᐅᔨᒪᑎᑦᑎᕙᒃᑐᖅ ᐊᐅᓪᓚᕐᕕᒋᕙᒃᑕᖏᓐᓂᒃ.

ᓄᕕᐱᕆᐅᑉ ᓄᙳᐊᓂᒃ ᑖᒃᑯᐊᒃ ᐃᖃᓗᖕᓅᓚᐅᕐᓯᒪᖕᒪᑎᒃ ᑐᓴᖅᑎᑦᑎᓇᓱᒡᓗᑎᒃ ᐅᑯᐊᓗ ᐃᓵᒃᓯᒪᒋᑦ ᐃᓅᓯᕐᒥ ᑲᑐᔾᔨᖃᑎᒌᑦ (Embrace Life Council), ᑲᑐᔾᔨᖃᑎᒌᖑᔪᑦ ᑖᒃᑯᐊ ᐱᓇᓱᒃᑕᖏᑦᑕ ᐊᔾᔨᖏᓐᓂᒃ ᐱᓕᕆᐊᖃᕐᒥᔪᑦ ᓄᓇᕗᒥᑦ ᐃᓱᒪᒃᑯᑦ ᐋᓐᓂᐊᖅᑐᓕᕆᓂᕐᒥᒃ ᓴᖅᑭᔮᖅᑎᑦᑎᒃᑲᓐᓂᕋᓱᒃᖢᑎᒃ.

“ᐅᓇ ᐱᐅᒻᒪᕆᒃᑐᖅ ᓲᖃᐃᒻᒪ ᐃᓅᓯᕐᒧᑦ ᐃᑲᔫᑎᑦᑎᐊᕙᒃ ᐊᒻᒪᓗ ᖁᕕᐊᓇᖅᖢᓂ ᖁᖓᑎᑦᑎᕙᒃᖢᓂ ᐊᒻᒪ ᐃᓄᖕᓂ ᓂᕆᐅᖕᓂᖃᖅᑎᑦᑎᓪᓗᓂ,” ᕼᐅᕙᒃ ᐅᖃᕐᑐᖅ.

“ᐊᐃᑦᑖᖑᒐᓗᐊᖅ ᑕᑯᖃᑦᑕᕐᓇᙱᓗᐊᕐᒪᑦ ᐊᓈᓇᒌᒃ ᐃᕐᓂᕇᑦ ᖃᓂᒋᑦᑎᐊᖅᑎᓪᓗᒍ ᑕᐃᒪᓕ ᒫᓐᓇ ᐱᒻᒪᕆᐊᓘᖕᒪᑦ ᑕᒪᓐᓇ.”

ᐊᔪᕐᓇᖅᑐᕐᓯᐅᕐᓇᖃᑦᑕᕋᓗᐊᖅᑎᓪᓗᒍ ᑖᒃᑯᐊᒃ ᐃᒃᐱᒍᓱᑦᑎᐊᕐᒪᑎᒃ ᐊᒻᒪ ᐃᑲᔪᖅᑐᖅᑕᐅᑦᑎᐊᖅᖢᑎᒃ ᖃᕋᓴᐅᔭᒃᑯᑦ ᖁᙱᐊᖅᐸᒃᑐᓂᒃ ᑖᒃᑯᓂᖓ.

ᐳᕇᑕᓐ ᐅᖃᓚᐅᕐᑐᖅ ᑕᐅᑐᒃᑕᐅᕝᕕᖓᓂ ᐅᓪᓗᕐᒧ ᖃᓄᐃᓕᐅᖅᐸᓪᓕᐊᓂᖓᓂ ᖃᐅᔨᒪᔾᔪᑎᒋᕙᓪᓕᐊᖕᒪᒍ, ᐅᖃᐅᓯᖃᖅᖢᓂ ᖁᕕᐊᓇᓚᐅᕐᓯᒪᔪᓂᒃ ᐅᓪᓗᕐᓂᒃ ᐊᒻᒪᓗ ᖁᕕᐊᓇᓚᐅᕐᓯᒪᙱᑦᑐᓂᒃ ᐊᑐᖅᐸᓪᓕᐊᓂᖏᑦᑎᒍᑦ.

“ᑕᒪᒃᑯᓂᖓ ᑐᓴᐅᒪᑎᑦᑎᔪᒪᖃᑦᑕᕋᒪ ᐊᒻᒪ ᖃᓄᐃᑉᐸᓪᓕᐊᔾᔪᑎᒃᑲ ᐅᖃᐅᓯᕆᓗᒋ5 ᐊᒻᒪᓗ ᖃᓄᐃᓕᐅᕐᓯᒪᓂᑦᑎᓐᓂᒃ ᐊᒻᒪ ᓇᒧᙵᐅᔭᕆᐊᒃᓴᑦᑎᓐᓂᒃ, ᓲᖃᐃᒻᒪ ᐊᒃᓱᕈᕐᓇᖅᑐᑐᐃᓐᓇᕐᓂᒃ ᑐᓴᐅᒪᑎᑦᑎᓂᐅᙱᒻᒪᑦ,” ᐅᖃᕐᑐᖅ.

“ᑐᓴᐅᒪᑎᑦᑎᓂᐅᖕᒪᑦ ᐊᓂᒍᐃᑦᑎᐊᕈᑎᕕᓂᕐᓂᒃ ᐊᑐᕐᓯᒪᓕᕐᑕᕐᓂ ᖃᐅᔨᒪᔾᔪᑎᐅᓂᐊᕐᒪ ᖁᕕᐊᓇᖅᑐᖃᕐᓂᖓᓂ ᐃᒡᓗᐊᒍᑦ.”