ᓄᓇᕗᑦ, ᐋᑐᕚᓗᑦ ‘ᐊᖏᖃᑎᒌᒍᑎᖃᕐᑐᑦ ᖃᓂᑦᑐᒧᑦ’ ᐋᓐᓂᐊᖃᖅᑕᐃᓕᓂᕐᒧᑦ ᐃᑲᔫᑎᐅᓇᔭᖅᑐᓂᒃ

For English version, see Nunavut, Ottawa reach ‘interim’ deal on non-insured health benefits

ᓄᓇᕗᒥᑦ ᒐᕙᒪᒃᑯᑦ ᐊᒻᒪᓗ ᒐᕙᒪᑐᖃᒃᑯᑦ ᓄᓇᖃᖅᑳᖅᑐᓕᕆᓂᕐᒧᑦ ᐱᔨᑦᑎᕋᐅᑎᓕᕆᔨᒃᑯᑦ ᐊᑎᓕᐅᓚᐅᕐᒪᑕ ᓄᑖᒥ ᐊᑐᖅᑕᐅᓚᐅᑲᖕᓂᐊᖅᑐᒥᓐ ᐊᖏᖃᑎᒌᒍᑎᒥ ᓇᐅᑦᑎᐅᒃᑯᒫᖃᙱᑦᑐᒥ ᐋᓐᓂᐊᖃᖅᑕᐃᓕᓂᕐᒧᑦ ᐃᑲᔫᑎᒃᓴᓂᒃ ᐊᒻᒪᓗ ᐋᓐᓂᐊᕐᕕᓕᐊᖅᑐᓄᑦ ᐊᐅᓪᓚᕈᑎᒃᓴᖏᓐᓄᑦ ᐊᑭᓕᐅᑎᒃᓴᓄᑦ ᓄᓇᕗᒻᒥᐅᓄᑦ ᑭᓯᐊᓂ ᐅᐱᕐᒦᖑᒃᑲᓐᓂᖅᐸ ᐊᑐᕈᓐᓃᓚᖅᖢᓂ.

ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᔮᓐ ᒪᐃᓐ ᑐᓴᖅᑎᑦᑎᓚᐅᕐᑐᖅ $190 ᒥᓕᐊᓐᓂ ᐊᖏᖃᑎᒌᒍᑎᖃᓚᐅᕐᓂᖏᓐᓂᒃ ᒪᐃ 23ᖑᑎᓪᓗᒍ ᒪᓕᒐᓕᕆᕝᕕᒃ ᐱᒋᐊᒃᑲᓐᓂᖅᑎᓪᓗᒍ ᐅᐱᕐᖔᒧᑦ ᐃᖃᓗᖕᓂ.

ᐅᓇ ᑮᓇᐅᔭᖅ ᐅᑯᓇᙶᖅᑐᖅ ᓄᓇᖃᖅᑳᖅᑐᓄᑦ ᐱᔨᑦᑎᕋᐅᔨᓕᕆᔨᒃᑯᓐᓂ ᑲᓇᑕᒥ, ᑖᒃᑯᐊ ᓇᐅᑦᑎᐅᒃᑯᒫᖃᖅᑎᑦᑎᕙᒃᑐᑦ ᐊᔾᔨᒌᙱᑦᑐᓂᒃ ᐋᓐᓂᐊᖃᖅᑕᐃᓕᓂᕐᒧᑦ ᐱᔨᑦᑎᕋᐅᑎᓄᑦ, ᓲᕐᓗ ᒪᑯᓄᖓ ᐃᔨᓕᕆᔭᐅᓂᕐᒧᑦ ᐊᒻᒪ ᑭᒍᑎᓕᕆᔭᐅᓂᕐᒧᑦ ᐃᓄᐃᑦ ᐊᒻᒪ ᓄᓇᖃᖅᑳᖅᑐᑦ ᐊᓪᓚᐃᑦ ᐅᕘᓇ ᓇᐅᑦᑎᐅᒃᑯᒫᖃᙱᑦᑐᓂᒃ ᐋᓐᓂᐊᖃᖅᑕᐃᓕᓂᕐᒧᑦ ᐱᓕᕆᐊᒃᓴᐅᕙᒃᑐᓄᑦ.

ᐅᓇ ᐊᖏᖃᑎᒌᒍᑎ ᐱᒋᐊᕐᕕᖃᖅᑎᑕᐅᔪᖅ ᐊᐃᕆᓕ 1, 2023ᒥ ᐊᒻᒪᓗ ᐃᓚᖃᖅᖢᓂ ᐃᑲᔫᑎᒃᓴᒃᑲᓐᓂᕐᓂ ᐊᑭᑦᑐᕆᐊᖅᐸᓪᓕᐊᓂᖓᓄᑦ ᐋᓐᓂᐊᖅᕕᓕᐊᖅᑐᓄᑦ ᖃᖓᑦᑕᐅᑎᓄᑦ.

ᐅᓇ ᐊᕐᕌᒎᖕᓄ ᒪᕐᕉᖕᓄᑦ ᐊᖏᖃᑎᒌᒍᑎ ᐅᖃᐅᓯᖃᕈᑎᐅᔪᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ “ᒫᓐᓇ ᑮᓇᐅᔭᑎᒍ ᑲᒪᒋᔭᕆᐊᖃᖅᑕᖏᓐᓂᒃ,” ᒪᐃᓐ ᐅᖃᕐᑐᖅ, ᐅᖃᒃᑲᓐᓂᖅᖢᓂ ᑖᓐᓇ ᒪᕐᕈᐃᓄᑦ ᒐᕙᒪᓕᕆᔨᕐᔪᓄᑦ ᐱᓕᕆᖃᑎᒌᒍᑎᒋᔭᐅᓂᐊᖅᖢᓂ ᐊᑯᓂᐅᓂᕐᓴᒧᑦ ᐊᖏᖃᑎᒌᒍᑎᓕᕆᓂᕐᒥᒃ.

ᒪᐃᓐ ᖁᔭᓕᓚᐅᕐᑐᖅ ᓄᓇᖃᖅᑳᖅᑐᓕᕆᓂᕐᒧᑦ ᐱᔨᑦᑎᕋᐅᑎᓄᑦ ᒥᓂᔅᑕᒥ ᐹᑕ ᕼᐊᔾᑐ ᐊᒻᒪ ᒐᕙᒪᑐᖃᒃᑯᑦ ᐋᓐᓂᐊᖃᖅᑕᐃᓕᓂᕐᒧᑦ ᒥᓂᔅᑕᖓᓂ ᒫᒃ ᕼᐋᓚᓐ ᐃᑲᔪᖅᑐᐃᓯᒪᓂᖏᓐᓂᒃ ᐊᖏᖃᑎᒌᒍᑎᓕᕆᓂᕐᒥᒃ.

“ᐅᓇ ᖃᒡᓕᕚᓪᓕᕈᑎᒋᔭᕗᑦ ᑭᒃᑯᓕᒫᓄᑦ ᑲᓇᑕᒥᐅᑕᓄᑦ, ᖃᓄᖅ ᐃᓅᓯᖃᕋᓗᐊᖅᐸᑕ, ᐱᔨᑦᑎᕋᐅᑎᒋᔭᕆᐊᖃᖅᑕᖏᓐᓄᑦ ᐊᒻᒪᓗ ᐊᓂᒍᐃᒍᑎᐅᔪᓐᓇᑦᑎᐊᖅᑐᓂᒃ,” ᕼᐊᔾᑐ ᐅᖃᓚᐅᕐᑐᖅᖅ ᑐᓴᒐᒃᓴᑎᒍᑦ.

ᐅᑭᐅᖅ ᒪᓕᒐᓕᕆᔨᒃᑯᑦ ᑲᑎᒪᑎᓪᓗᒋᑦ ᒪᐃᓐ ᓇᓗᓇᐃᔭᐃᓚᐅᕐᓯᒪᔪᖅ ᐃᑲᔫᑎᒃᓴᑦ ᐊᒥᒐᔭᓐᓂᖏᓐᓂᒃ ᒪᑯᓄᖓ ᓇᐅᑦᑎᐅᒃᑯᒫᖃᙱᑦᑐᓄᑦ ᐋᓐᓂᐊᖃᖅᑕᐃᓕᓂᕐᒧᑦ ᐃᑲᔫᑎᒃᓴᓄᑦ ᐱᓕᕆᐊᒃᓴᓂ.

ᕕᕝᕗᐊᕆᐅᑎᓪᓗᒍ ᐅᖃᓚᐅᕐᓯᒪᔪᖅ ᓄᓇᕗᑦ “ᐊᓯᐊᒎᕈᑎᒃᓴᖃᕋᔭᙱᓐᓂᖏᓐᓂᒃ” ᑭᓯᐊᓂᓕ ᑖᓐᓇ ᐱᓕᕆᐊᕆᓇᓱᒃᑕᖓᑦ ᐋᑐᕚᒥ ᐱᓕᕆᐊᖑᖔᕐᓂᐊᕐᓗᓂ.

ᐃᖃᓗᖕᓄᑦ ᐳᓛᖅᑎᓪᓗᒍ ᒫᔅᓯᒥ ᕼᐋᓚᓐ ᐅᖃᓚᐅᕐᓯᒪᔪᖅ ᖃᐅᔨᒪᓂᖓᓂᒃ ᓄᓇᕗᑦ “ᐱᐅᓂᕐᓴᒥ ᓇᐅᑦᑎᐅᒃᑯᒫᓕᕆᓂᖃᕆᐊᖃᕐᓂᖏᓐᓂᑦ.”

ᐊᐱᖅᓱᖅᑕᐅᑎᓪᓗᒍ ᒪᐃᓐ ᐅᖃᓚᐅᕐᓯᒪᔪᖅ ᐊᖏᖃᑎᒌᒍᑎ ᐋᖅᑭᒃᑕᐅᓕᓚᐅᕐᓂᖓᓂ ᐋᔩᖃᑎᒌᑲᑕᒃᐸᒃᖢᑎᒃ ᒐᕙᒪᑐᖃᒃᑯᓐᓂ ᐊᒻᒪᓗ ᖁᔭᓕᒋᓪᓗᓂ ᓄᓇᖃᖅᑳᖅᑐᓕᕆᓂᕐᒧᑦ ᐱᔨᑦᑎᕋᐅᑎᓕᕆᔨᒃᑯᑦ ᑲᓇᑕᒥ ᐃᑲᔪᑐᐃᓯᒪᓂᖏᓐᓂᒃ ᓄᓇᕗᒥᑦ ᐋᓐᓂᐊᖃᖅᑕᐃᓕᓂᕐᒧᑦ ᐱᔭᕆᐊᖃᖅᑕᖏᓐᓂᒃ.

ᑖᓐᓇ ᐊᕐᕌᒍᒧᑦ ᐊᑐᕐᓯᒪᓕᐊᓂᒃᖢᑎ ᐊᖏᖃᑎᒌᒍᑎ, ᒪᐃᓐ ᐅᖃᓚᐅᕐᑐᖅ ᐋᔩᖃᑎᒌᑲᑕᖕᓂᖏᓐᓂᒃ ᐊᑯᓂᐅᓂᕐᓴᒧᑦ ᐃᑲᔫᑎᒃᓴᓕᕆᓂᕐᒥ ᐅᓇ ᒫᓐᓇ ᐊᖏᕈᑎ ᐃᓱᓕᑉᐸᑦ ᒫᔅᓯᒥ ᐊᑐᖅᑕᐅᔪᓐᓇᓛᖅᑐᒥᓐ.

“ᖃᓄᐃᓕᖓᓂᕗᑦ ᓱᖁᓯᖅᓯᒪᙱᑦᑐᖅ ᒪᐅᓇ ᓄᓇᖃᖅᑳᖅᑐᓕᕆᓂᕐᒧᑦ ᐱᔨᑦᑎᕋᐅᑎᓕᕆᔨᒃᑯᑦ ᑲᓇᑕᒥ ᐃᑲᔪᕆᐊᖃᕐᓂᖏᓐᓂ ᐃᑲᔫᑎᒃᓴᑎᒍ ᐱᓕᕆᐊᒧᑦ ᐊᒻᒪᓗ ᑲᔪᓯᓂᐊᖅᖢᑕ ᐱᓕᕆᖃᑎᒌᓗᑎᒍᑦ ᑕᒪᑐᒧᖓ,” ᒪᐃᓐ ᐅᖃᕐᑐᖅ.

“ᓈᒻᒪᒃᓴᑦᑎᐊᒻᒪᕈᒍᓐᓇᔾᔮᙱᓐᓇᑦᑕ ᑕᐃᒪᓕ ᕿᓃᓐᓇᐅᔭᖅᖢᑕ ᐱᐅᓯᕚᓪᓕᕈᑎᐅᓇᔭᖅᑐᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ.”